Jy het al gehoor van pêrels wat om jou nek hang, maar wat van pêrels op jou bord? Dit klink luuks, of moet ons sê … fancy? Fancy Schmancy is ’n kreatiewe nisboerdery wat eetbare pêrels vervaardig. Hierdie klein geurbolletjies word van verskeie voedselprodukte gemaak en kan gebruik word om disse, nageregte en drankies ’n unieke voorkoms en verrassende geurervaring te gee.

Carla, die eienaar van Fancy Schmancy, was vir jare ‘n huismamma. Toe haar jongste kind egter skool toe gaan, wou sy iets nuut en kreatie aanpak. Haar inspirasie het gekom van ’n Franse produk wat sy raakgeloop het, en sy het besluit om haar eie weergawe van eetbare pêrels plaaslik te ontwikkel. Wat begin het as ’n interessante idee, het gou ontwikkel in ’n passieprojek. Haar eerste produk was balsamiese-asynpêrels, maar vandag sluit die reeks ’n verskeidenheid soet en sout geure in.

Wat in 2019 in Carla se kombuis begin het, het intussen uitgebrei na ’n besigheid met ’n eie fabriek en ’n span werknemers wat bydra tot die sukses van Fancy Schmancy. Hoewel die pandemie haar produkbekendstelling vir ’n paar maande vertraag het, het dit haar ook die geleentheid gebied om haar produkte verder te verfyn en die onderneming sterker te vestig. Soos met baie innoverende idees, was die pad nie altyd maklik nie. Daar was uitdagings, mislukkings en baie ure se toetsing en aanpassing. Maar met deursettingsvermoë en ’n duidelike visie het Carla aangehou totdat sy die perfekte resep ontwikkel het.

Vandag bied Fancy Schmancy ’n indrukwekkende verskeidenheid pêrels, insluitend geure soos aarbei, perske en soja. Maar wie weet wat die toekoms inhou? Fancy Schmancy se kreatiwiteit ken duidelik geen perke nie. Carla en haar span is ook gretig om saam met ander produsente te werk om pêrels te ontwikkel wat uniek is aan hul produkte. Dit skep opwindende moontlikhede vir nuwe geure en samewerkings.

Of dit nou gebruik word om ’n drankie af te rond, ’n nagereg te versier of ’n unieke geurervaring te skep, Fancy Schmancy se eetbare pêrels bewys dat kos ook speels kan wees. Met ’n passie vir innovasie en ’n oog vir die buitengewone, wys Carla dat selfs die kleinste idees in iets besonders kan ontwikkel.

Vir meer inligting, volg @fancyschmancypearls op sosialemedia, besoek www.gfancyschmancy.co.za  skryf aan info@sfancyschmancy.co.za of bel 084 678 0000

• Volg @Nisboere op Facebook en Instagram of besoek www.nisboere.co.za om saam met ander nisboere te leer en ook om jóú storie met ons te deel.