Nadat sy as sjef gekwalifiseer het, was Natasha Jacka op pad na ’n blink toekoms in Kaapstad se fynkookkunsbedryf. Tog was dit nie die kos op die bord wat haar die meeste gefassineer het nie, maar die wyn in die glas langsaan. Sy wou die misterie van goeie wyn ontrafel.

Die voor die hand liggende volgende stap was wingerd- en wynboukunde aan die Elsenburg-landboukollege naby Stellenbosch, die hartland van die Kaapse wynkultuur. Hier het sy geweet haar ware passie lê.

Ná drie jaar se studie het sy in 2021 Alinea Wines naby Noordhoek aan die Kaapse kuslyn begin. “Alinea is die Latynse woord vir ’n nuwe denkrigting,” vertel sy. Vir Natasha rus wynmaak op twee bene: wat in die wingerd gebeur en wat in die kelder plaasvind.

“In die wingerd werk ek graag met geharde, droogtebestande variëteite, omdat waterskaarste ’n werklikheid in Suid-Afrika is. Dit beïnvloed altyd my keuse van kultivars. In die kelder is minimale intervensie die kern van alles wat ek doen. Die oorspronklike aard, eienskappe en ligging van die wingerd moet in die finale wyn weerspieël word.”

Sy koop druiwe van wingerde in verskillende gebiede aan om met uiteenlopende geure en style te werk. “Ek is bevoorreg om met verskeie variëteite te werk. Dis soos ’n leë doek waarop ek my eie skildery kan verf.” As jong wynmaker beskou sy dit as ’n voortdurende leerproses om die druif beter te verstaan.

Vir haar gaan alles oor ligging. “Daardie ligging vind weerklank in die wyn.” Daarom besoek sy wingerde persoonlik, ontmoet produsente en beoordeel elke terrein noukeurig voordat sy ’n besluit neem.

Minimale intervensie begin reeds wanneer die druiwe by die wynmakery aankom. “Ek werk slegs met inheemse gis deur spontane fermentasie. Ek voeg geen ensieme by nie en gebruik ouer, tradisionele wynmaakmetodes, veral vir rooiwyn. Wyn is die uitdrukking van sy omgewing, en so moet dit bly. Daardie ‘sense of place’ moet jy kan proe.”

Benewens wynmaak moes Natasha ook leer hoe om ’n onderneming te bestuur. “As klein, onafhanklike wynprodusent was dit ’n harde maar waardevolle leerskool.”

Haar raad aan jong wynmakers en entrepreneurs is eenvoudig: “Doen wat jou hart vir jou voorskryf. Moenie bang wees vir harde werk nie. En bly altyd nuuskierig.”

• Vir meer inligting, volg @Alinea Windes op sosialemedia, besoek www.alineawines.co.za, skryf aan natasha@alineawines.co.za, of bel 083 689 3609.
• Volg @Nisboere op Facebook en Instagram of besoek www.nisboere.co.za om saam met ander nisboere te leer en ook om jóú storie met ons te deel.
• Besoek ook www.wowbuy.co.za om van die produkte wat in van die episodes verskyn, aan te skaf.